വിദ്യാഭ്യാസപരീക്ഷണങ്ങൾക്ക് ഏറെ വിളനിലമായിട്ടുള്ള ഭൂമികയാണ് നമ്മുടെ നാട്. ഈ ശ്രേണിയിൽ വരുന്ന ഒന്നാണ് ഇടുക്കി ജില്ലയിലെ പൂമാലയിൽ നടന്ന വിദ്യാഭ്യാസ പരിശ്രമം. വിദ്യാഭ്യാസത്തിലൂടെ വിമോചിതമാകുന്ന ഒരു തലമുറയെയും നവീകരിക്കപ്പെടുന്ന ഒരു സമൂഹത്തെയും രൂപപ്പെടുത്താൻ ഒരു നാട് കൂട്ടായി നടത്തിയ സമാനതകളില്ലാത്ത ഈ പ്രവർത്തനങ്ങൾ ആവേശകരമായ അനുഭവമായിമാറുന്നു. മലയോരഗ്രാമമായ പൂമാലയിൽ പന്ത്രണ്ടോളം വരുന്ന ഊരുഗ്രാമങ്ങൾക്ക് നടുവിൽ ഒരു ഗവ. ട്രൈബൽ സ്കൂൾ സാധ്യമായതിന്റെ കഥയാണിത്.