പോര്‍ക്കലി

"പ്രകൃതി വിഭവങ്ങള്‍ക്കായുള്ള പോരാട്ടം മാനവ സംസ്‌കാരത്തോളം പഴക്കമുള്ളതാണ്. സാമൂഹ്യമാറ്റത്തിനായി ത്രസിച്ചു നിന്ന കേരളത്തില്‍ അരങ്ങേറിയ കര്‍ഷക മുന്നേറ്റങ്ങളുടെ ഭാഗമാണ് ശൂരനാട് സമരം. കഴിഞ്ഞ നൂറ്റാണ്ടിന്റെ നാലാം പാദത്തിന്റെ അവസാനം ജന്മിത്തത്തിന്‍കീഴില്‍ ഞെരിഞ്ഞമര്‍ന്നിരുന്ന ശൂരനാട്ടെ കര്‍ഷകരും തൊഴിലാളികളും പൊട്ടിത്തെറിച്ചു. സാധാരണ മനുഷ്യര്‍ മത്സ്യം പിടിച്ചു ഉപജീവനം നടത്തിപ്പോന്ന കുളവും നീര്‍ച്ചാലും ജന്മിമാര്‍ ലേലം ചെയ്തുകൊടുത്തതോടെ പ്രതിഷേധവും രൂക്ഷമായി. ഏറ്റുമുട്ടലിനെത്തുടര്‍ന്ന് നാല് പൊലീസുകാര്‍ കൊല്ലപ്പെട്ടു. തുടര്‍ന്ന് നടന്ന പൊലീസ് തേര്‍വാഴ്ച ചരിത്രത്തിന്റെ ഭാഗമാണ്. ശൂരനാട് സമരകാലത്ത് എ പി കളയ്ക്കാട് വിദ്യാര്‍ത്ഥിയായിരുന്നു. തന്റെ കണ്‍മുന്നില്‍ ഇതള്‍ വിരിഞ്ഞ സംഭവ പരമ്പരകള്‍ അതിന്റെ തീവ്രത ഒട്ടും ചോര്‍ന്നുപോകാതെ അനേകം കഥാപാത്രങ്ങളിലൂടെ അവതരിപ്പിക്കുകയാണ് പോര്‍ക്കലിയില്‍. കേരളീയര്‍ ഏറെ വായനയും പുനര്‍ വായനയും നടത്തിയിട്ടുള്ള ഈ കൃതി ഏതു കാലത്തും പ്രസക്തമാകുന്നത് അതിന്റെ ഉള്‍ക്കരുത്തുകൊണ്ടാണ്. പ്രണയവും ധീരതയും വിപ്ലവാവേശവും ചരിത്രവും ഇഴചേര്‍ക്കപ്പെട്ട ഈ ഉജ്ജ്വല കൃതി സാഭിമാനം ഞങ്ങള്‍ പ്രസിദ്ധീകരിക്കുന്നു. "