ധൈഷണികതയ്ക്കും കൊടിയ വിപത്തുകള്‍ക്കും ഇടം കിട്ടിയ മണ്ണാണ് ജര്‍മ്മനിയുടേത്. കാള്‍ മാര്‍ക്‌സും എംഗല്‍സും ഹെഗലും ഇമ്മാനുവല്‍ കാന്റും വാള്‍ട്ടര്‍ ബെഞ്ചമിനും ബെര്‍ത്തോള്‍ഡ് ബ്രഹ്തും ഹെര്‍മ്മന്‍ ഹെസ്സെയും തിയോഡര്‍ അഡോണയും എറിക് ഫോമും വെര്‍ണര്‍ ഹെര്‍ഡോഗും ഗുന്തര്‍ഗ്രാസും തോമസ് മന്നും പ്രതിഭകള്‍ വിരിയിച്ചത് ഈ മണ്ണില്‍ നിന്നുകൊണ്ടാണ്. അഡോള്‍ഫ് ഹിറ്റ്‌ലറും ഓഷ്‌വിറ്റ്‌സും കൂട്ടക്കുരുതിയും മാനവികതയ്ക്ക് പുഴുക്കുത്തേല്പിച്ചതും ഇതേ മണ്ണില്‍. കാള്‍ മാര്‍ക്‌സും ജന്നിയും പ്രണയപൂര്‍വ്വം കൈകോര്‍ത്തു നടന്ന ട്രിയറിലൂടെ വെര്‍ണര്‍ ഹെര്‍ബോഗ് കാല്‍നടയായി മ്യൂണിക്കില്‍നിന്നും പാരീസിലേക്ക് പോയ വഴിയിലൂടെ, മൊസാര്‍ട്ടിന്റെ പ്രണയ നഗരത്തിലൂടെ വി കെ ജോസഫ് എന്ന ചലച്ചിത്ര പ്രവര്‍ത്തകന്‍, ഫിലിം സൊസൈറ്റി പ്രവര്‍ത്തനവും ചലച്ചിത്ര വിമര്‍ശനവും ജീവവായുവാക്കിയ എഴുത്തുകാരന്‍, നടത്തിയ യാത്രകളാണീ പുസ്തകത്തില്‍. മരങ്ങള്‍ സ്വര്‍ണ്ണവര്‍ണ്ണത്തിലുള്ള ഇലകള്‍ വീഥിയിലേക്കു കൊഴിച്ചിടുന്ന ഒരു ശരത്ക്കാലത്ത് മഴനാരുകള്‍ സ്വപ്നത്തിലെന്നപോലെ ഇറ്റുവീഴുന്ന ജര്‍മ്മന്‍ നഗരങ്ങളിലൂടെ ലോക ചലച്ചിത്ര കാവ്യങ്ങളിലൂടെ, എഴുത്തുകാരിലൂടെ, ചരിത്രത്തിലൂടെ വി കെ ജോസഫ് നടത്തുന്ന യാത്രകള്‍ നവമായ ഒരു ചൈതന്യം വായനക്കാരില്‍ പടര്‍ത്തുവാന്‍ പ്രാപ്തമാണ്. യാത്രയെഴുത്ത് എത്ര അവാച്യമായ അനുഭവമാണെന്ന് ഈ കൃതി നിങ്ങളെ ഓര്‍മ്മിപ്പിക്കും. ഹോളോകോസ്റ്റിന്റെ ഇരയായ ജര്‍മ്മന്‍ ചിത്രകാരന്‍ ഫെലിക്‌സ് നസ്ബാം (Felix Nussbaum) ന്റെ ഒരു പെയിന്റിങ്ങാണ് ഈ പുസ്തകത്തിന്റെ കവര്‍ചിത്രം തയ്യാറാക്കാനായി ഉപയോഗിച്ചിരിക്കുന്നത്. ചരിത്രത്തില്‍ നിന്ന് ഉയര്‍ന്നുകേള്‍ക്കുന്ന നാസി ഭീകരതയുടെ നിലവിളികള്‍ ആന്തരികമായി ഈ കൃതിയില്‍നിന്ന് ഉയര്‍ന്നു കേള്‍ക്കാം
7994678841